Nú þegar sér fyrir endan á samkomubanni þá keyrum við æfingar í gang aftur hjá Sundfélaginu Ægi, en þó með ákveðnum fyrirvörum sem nefndir eru neðar:

• Gullfiskanámskeið byrja aftur þriðjudaginn 5. maí. Námskeiðunum átti að ljúka þann 3. apríl og hafa Gullfiskar því misst af þremur vikum. Við bjóðum Gullfiskunum okkar að klára námskeiðið frá 5. til 20. maí. Það ríkir aðeins óvissa um hvaða þjónustu yngstu börnin fá í búningsklefum en foreldrum er óheimilt að fara með börnum inn í búningsklefa í núvernandi samkomubanni. Verið er að vinna að lausn á þessu.

• Bleikjur hefja æfingar aftur þann 4. maí. Bleikjur hafa misst 6 vikur af æfingum og því bjóðum við Bleikjunum að bæta 4 vikum við æfingaáætlunina og æfa út júní.

• Laxar og Höfrungar hefja aftur æfingar þann 4. maí. Þessir hópar hafa líka misst 6 vikur af æfingum og bjóðum við þeim að bæta við 4 vikum við áætlunina og æfa út júní.

• Brons og Silfurhópar munu hefja æfingar þann 4. maí skv. áætlun. Nú er gert ráð fyrir að þessir hópar æfi út júlí mánuð.

• Sundmenn í Gullhópi sem eru 17 ára og eldri þurfa að æfa á öðrum tíma en þeir sem yngri eru. Verið er að skoða fyrirkomulagið á því en ein hugmyndin er að þeir æfi á tímanum 15:00 – 16:30 í útilauginni í Laugardal amk á meðan núverandi skilyrði samkomubanns eru í gildi (þ.e. út maí). Þjálfari verður í sambandi við sundmenn vegna þessa.

• Sumarsundskóli Ægis. Við gerum ráð fyrir að Sumarsundskóli Ægis geti hafist þann 8. júní. Auglýsing vegna þessa verður birt fljótlega.

FYRIRVARAR OG FREKARI UPPLÝSINGAR:

Til þess að þessi áætlun gangi eftir þá þarf að bíða eftir staðfestingu frá ÍTR um opnun sundlauga í Reykjavík. Fundað verður með ÍTR í næstu viku og staðfesting mun birtast hér á heimasíðu Ægis.

SSÍ stefnir að því að Aldursflokkameistaramótið verði haldi um miðjan júlí og að ÍM50 verði haldið í lok júlí. Þetta er óstaðfest og bíða þarf frekari upplýsinga um afléttingu samkomubanns til að hægt sé að staðfesta þetta.

Upplýsingar um framhaldið verða settar hér á síðuna um leið og þær berast. Vinsamlegast beinið fyrirspurnum til þjálfara á facebook og/eða í gegnum Sportabler.

Stórn og þjálfarar.

Í ljósi strangari skilyrða í samkomubanni sem settar voru af stjórnvöldum í dag og lokun sundlauga þá verður aðalfundi Ægis sem fyrirhugaður var miðvkudaginn 25. mars frestað um óákveðinn tíma.

Stjórnin.

ÍSÍ hefur nú gefið út þau tilmæli að allar skipulagðar æfingar íþróttafélaga skuli falla niður um óákveðinn tíma. Jafnframt hefur ÍBR gefið út að allar æfingar í mannvirkjum borgarinnar skuli falla niður. Þetta hefur þegar tekið gildi. Það verða því engar æfingar hjá Sundfélaginu Ægi á morgun og um óákveðinn tíma. Við hvetjum þjálfara félagsins til að búa til skemmtilegar og gagnlegar heimaæfingar fyrir sundmenn og senda út á Sportabler á meðan þessu stendur. Þá viljum við benda á að á meðan sundlaugar eru opnar almenningi að þá geta sundmenn farið og synt á eigin vegum og verða þá að fara eftir þeim reglum sem settar hafa verið, eins og að viðhalda 2m fjarlægð frá hver öðrum. 

Evrópska sundsambandið (LEN) hefur frestað Evrópumeistaramótinu sem halda átti í maí fram í ágúst. Sundsambandið mun funda í næstu viku og ræða ma. um frekari frestun Íslandsmeistaramóts.

Meiri upplýsingar má finna á heimasíðu Sundsambandsins.

Uppfært: Nú er búið að opna fyrir skráningar á 8 vikna viðbótarnámskeið Gullfiska. Hægt er að skrá á skráningarvef félagsins hér.

Ægir mun bæta við 8 vikna Gullfiskanámskeiði frá 14. apríl til 9. júní. Skráning ætti að geta hafist nú í vikunni. Boðið verður upp á 3 hópa á sem verða sem fyrr á þriðjudögum og fimmtudögum, 30 mínútur í senn og hefjast kl. 16:30, 17:05 og 17:40. Frí verður á sumardaginn fyrsta 21. apríl og uppstigningardag 19. maí. Námskeiðin munu kosta kr. 16.900,- og skráning mun hefjast í vikunni. Ath. aðeins verða skráðir 12 krakkar í hvern hóp. Námskeiðin eru fyrir krakka frá 4. ára aldri og eru tilvalin fyrir krakka sem vilja byggja grunn fyrir skólasund. Það verða þau Símon Geir Þorsteinsson og Hjördís Freyja Kjartansdóttir sem verða áfram með námskeiðin.